Kreu i ARRSH-së inspekton kantierin rrugor në Gjirokastër-Lazarat

  

Kreu i ARRSH-së inspekton kantierin rrugor në Gjirokastër-Lazarat

Qëndro: “Rehabilitim të plotë aksit, përfundon brenda Dhjetorit. Investimi rreth 1 milion euro, ndërhyrja në 3.5 kilometra”.

Deputeti Çuçi: “Vëmendja jonë tek njerëzit dhe problemet e tyre”.

Drejtori i Autoritetit Rrugor Shqiptar, Afrim Qëndro, shoqëruar nga deputeti Bledi Çuçi inspektuan punimet që po kryhen për rehabilitimin e aksit rrugor që lidh Gjirokastrën me Lazaratin. Investimi arrin në vlerën rreth 1 milion euro, kryhet në kuadër të projektit të përbashkët me Bankën Botërore për mirëmbajtjen me performancë të akseve rrugore kombëtare dhe parashikon rehabilitimin e plotë të segmentit në 3.5 kilometra.

“Duke filluar nga rrethrrotullimi i ashtuquajtur i Lagjes Punëtore deri në fundin e fshatit Lazarat, ku bëhet dhe lidhja me pjesën e rrugës së re. Është një rehabilitim që i ka të gjitha elementet, paketën e shtresave, tumbinot, kanalet dhe veprën në të cilën ne ndodhemi. Një tumbino e madhe, e cila ka qenë shumë problematike në funksionimin e aksit. Është një investim gati 1 milion euro në këtë projekt dhe ne mendojmë se edhe sipas grafikut të punimeve, brenda Dhjetorit ta kemi të mbyllur këtë vepër dhe ky aks i rëndësishëm i korridorit veri-jug të jetë në standard”, u shpreh Qëndro.

Më tej, ai vlerësoi edhe bashkëpunimin me Policinë e Shtetit dhe veçanërisht Policinë Rrugore për menaxhimin e trafikut gjatë ndërhyrjeve intensive në disa akse kombëtare në gjithë territorin.

“Dua të falenderoj Policinë Rrugore dhe gjithë Policinë e Shtetit, që në akset kombëtare ku ne jemi duke ndërhyrë, kemi një bashkëpunim dhe sintoni të plotë, me plan të detajuar, i cili na vjen për shtat për menaxhimin e trafikut”, nënvizoi Qendro.

Deputeti Bledi Çuçi tha se vëmendja e qeverisë duhet të vazhdojë të jetë tek njerëzit dhe larg retorikave politike të ditës mes pozitës dhe opozitës.

“Kjo është një shprehje tjetër e qartë e asaj që themi shpesh, gjithë vëmendja duhet të jetë tek qytetarët, duke e lënë sa më larg retorikën politike boshe. Duhet të merremi pikërisht me problemet që shqetësojnë komunitetin dhe kjo ka qenë një nga pikat më problematike për sa i përket sidomos përmbytjeve”, theksoi Çuçi.